在紅磡小街有個菜檔，丁方大小，三面牆掛滿提了字的人像畫，「鬥志居高臨下，煩惱化整為零」、「風吹不倒，雨打不惱」……另類菜檔畫廊，在網絡爆紅。原來，主理畫廊的菜販畫家肥強，卧虎藏龍。61歲的他，做過連鎖鞋店大老闆，由經理做到保安；曾經爛賭，諗過自殺，自言在大世界走了一圈，「呢啲畫，鼓勵人仲要鼓勵自己！」洋名Thomas的肥強如是說。
肥強的菜檔位於紅磡黃埔街舊區，擠在大堆雜貨舖與街坊成衣店中間，毫不起眼，但一年四季都愛赤膊上陣的他，卻是街坊紅人無人不識。記者拿着其菜檔畫廊的網上圖片尋人，「哦，成日喺檔口聽英文歌、掛晒啲畫出嚟嗰個肥佬吖嘛！」長年赤膊、聽老外金曲、滿口中英文夾雜、愛畫勵志畫，成為他獨有的街坊標記。
「我玩自由搏擊，身體好，冬天唔着上衫，冇問題！」「我姓黃，你叫我Thomas吖，啲街坊多數叫我肥強！」雙目炯炯有神的肥強，說話嗓門大，連珠炮發，談到他最愛的畫，手舞足蹈，「我賣菜為咗生活，但為生活都唔可以冇自己生活。畫畫，係我興趣，寫啲金句上去，勉勵到人又勉勵到自己，何樂而不為？」
「我玩自由搏擊，身體好，冬天唔着上衫，冇問題！」「我姓黃，你叫我Thomas吖，啲街坊多數叫我肥強！」雙目炯炯有神的肥強，說話嗓門大，連珠炮發，談到他最愛的畫，手舞足蹈，「我賣菜為咗生活，但為生活都唔可以冇自己生活。畫畫，係我興趣，寫啲金句上去，勉勵到人又勉勵到自己，何樂而不為？」
畫板是轉角文具舖盛惠四蚊的四方麻雀紙，畫筆就地取材，箱頭筆、螢光筆，五顏六色，百分百不拘一格。「有啲外國人行過，唔知中文寫乜嘢，但就舉起手指公叫good；理大宿舍喺附近，有學生同我傾點樣畫，有人欣賞，梗係開心！啲街坊行過又會問我：『肥強！做乜嘢唔換畫，睇到好悶』，咁我又畫啲新嘅掛上去。」守着自己的畫廊菜檔小天地，自得其樂，但強悍的外表，卻有悲傷過去。「70年代佐敦有個大華商場，我喺嗰度開鞋店，初初生意好，連開三間；83年股災，經濟一衰，乜嘢都冇」。
資金周轉不靈，小賭怡情的他，決定去澳門賭一鋪，「得就得，唔得就執笠！」結果，就好似無數賭仔的故事，不但救不了一盤生意，還欠下巨債。「嗰時諗過死，一個人去咗淺水灣，思前想後，想跳落去，但我識游水呀，死唔去㗎喎……自殺係一念之間，唔死，就要諗辦法生存，去酒樓做侍應，由零開始，好在我英專讀到中五，識啲英文，做零售時又識啲日文，尖沙嘴遊客區，做唔夠一年就升咗做部長，後來仲做埋經理」。馬死落地行的肥強，做幾份工還債，無暇傷春悲秋，「有得做好過冇得做！」成了他翻身的座右銘。
只是，本性難移，做了幾年酒樓經理，儲了一筆錢，又心思思想做老闆，「嗰時喺深水埗，見到啲飯店仔，細細間，好多枱放晒喺出面，照辦煮碗，點知人哋放冇事，我就收告票被人告阻街，捱咗一年又執。」打回原形的肥強唯有轉做保安，輾轉經朋友介紹，到菜檔打散工，三年前，開了這間畫廊菜檔。走了一圈，又做起老闆來。
「𠵱家小本經營，蝕極有個譜，但自己做，自己控制，悶悶地，出去食口煙；冇生意，心血來潮，畫吓畫又得，自由自在。𠵱家啲人，郁吓嗌唔開心，我就話，開心要自己搵，唔好學熊貓，等人餵，只食竹葉，咁樣好快死！」雜食肥強哥，千帆過盡，哪管蛟龍困街市，就如他的畫：「風吹不倒，雨打不惱」，鬥志仍然激昂
爽報09112012
沒有留言:
張貼留言